Lionel Messi Oo Shaaciyay Xiddigaha Uu U Codeeyay Abaalmarinta Fifa Ballon d’Or.

Lionel Messi ayaa u sheegay wariyayaasha maanta inuu dhiibtay codkiisa abaalmarinta Ballon d’Or 2012, isagoo sheegay inuu rajeynayo in midka ka mid ah saaxiibadiis inay ku guuleystaan.

Xiddigaan oo ceyrsanaya inuu jabiyo rikoorka Gerard Muller uu ku dhaliyay 85 gool hal sanno, ayaa maanta si cad uga hadlay codeyntiisa abaalmarinta sannadlaha ee FIFA Ballon d’Or.

“Waan codeeyay, waana idiin sheegayaa cidaan u codeeyay waa Xavi, Iniesta iyo Aguero” ayuu xiddiga reer Argentina yiri, isagoo haatan ugu cadcad inay markii afaraad oo isku xigta ku guuleysto abaalmarinta.

Messi ayaa codeyn kara madaama uu yahay kabtanka xulkiisa Argentina, waxaana uu sida uu sheegay kaalinta koowaad, tan labaad iyo seddexaad kala geliyay Xavi, Iniesta iyo Aguero.

Abaalmarintan ayaa waxaa u codeeya kabtanada iyo tababarayaasha xulalka qaranka iyo joornaaliistayaal caalamka laga soo xulay.

“Iskuma codeyn karin shaqsi ahaanteyda. Waan ku faraxsanaan lahaa hadii ay ku guuleystaan Xavi ama Iniesta. Kuma aanan guuleysteen kubada dahabka asxaabteyda la’aantood.”

Messi ayaa mar kale wax laga weydiiyay waxa uu ka qabo ninka ay xafiiltamaan ee xiddiga Real Madrid Cristiano Ronaldo.

“Lama tartamo isaga. Waxaan kaliya isku dayaa inaan shaqadeyda ugu fiican u qabto Barcelona iyo Argentina.

“Xafiiltanka waa wax joornaaliistayaasha ay xiiseynayaan. Mar walba oo macquul ah waxaad isku daydaan inaad isku kaaya barbardhigtaan.”

Waxaa Qoray: Saed Mohamed Balaleti ( @Saedmohd)